文：東方娛樂網（本文由 東方娛樂 授權轉載）
電影版「使徒行者」日前在澳門拍攝一場煞科戲，這場戲是描寫飾演釘姐的佘詩曼與古天樂在泳池邊相遇過程，這場戲因為天雨關係曾三度取消，被劇組人員取笑他們兩位貴人出門招風雨，佘詩曼今次更要泳衣上陣，她自言拍打戲打到周身瘀，擔心穿泳衣露瘀痕有礙觀瞻！
佘詩曼與古天樂早前到澳門新濠影匯酒店拍電影版「使徒行者」，今次酒店特別封了整個泳池供拍攝之用，導演更出動航拍，由於是煞科戲劇組人員準備了開香檳慶祝，該片監製樂易玲也到現場打氣！另外，又邀請到韓國女藝人Clara（李成敏）演出！
今次要泳衣上陣的佘詩曼，保持其穩陣派作風，挑選了一件穩陣型的背心短裙仔泳衣上陣，不過她的白滑膚色與古仔的朱古力色相映成趣。佘詩曼笑說：「我好耐之前著過泳衣拍劇集，不過大銀幕係第一次，之前我有幾場打鬥戲，拍到我一身瘀晒，手、腳、大腿、盆骨部位都瘀晒，當時心諗仲要著泳衣點遮住啲瘀痕，咁咪好核突，好在因天雨關係個期一改再改，可以等到散晒瘀先拍，今次係最佳狀態，呢場戲其實一波幾折，因為之前天氣太凍又落雨，所以改咗三次先拍到。」
佘詩曼和古天樂今次是第二度合作拍戲，上次是合拍「衝上雲霄」，佘詩曼說：「上次同古仔都係有場泳池激情戲，本來今次初睇劇本呢場戲係畀古仔推落水，點知拍時無端端改冇咗呢場戲，初時我仲擔心又要落水，因為落水個樣唔靚嘛！妝頭都甩晒亂晒咁，今日部戲煞青又天朗氣青又唔使落水，天助我也!」
